Uhusiano Wako Hujengwa Na Wewe Mwenyewe-1

Kuwa na uhusiano ni mwanzo wa kuwajibika zaidi. Maana uhusiano unahitaji kujengwa na kutunzwa ili uwe imara zaidi. Mahusiano mengi huvunjika au huwa si mazuri, kwa sababu wengi hudhani kuwa ukimpata rafiki kinachofuata ni kufurahia uhusiano. Sawa! Lakini ni lazima ujue kuwa ni lazima kuwajibika zaidi ili thamani na ubora wa uhusiano wako udumu na uzidi kukua. Yafuatayo ni baadhi ya mambo muhimu ya kuzingatia katika kujenga na kuuimarisha uhusiano mzuri.

i.                    Upendo

Upendo ni kitu muhimu na cha thamani sana katika uhusiano wowote duniani. Maana hata uhusuiano wetu na Mungu umejengwa katika upendo. Upendo ni kifungo cha ukamilifu. “Zaidi ya hayo yote jivikeni upendo, ndio kifungo cha ukamilifu” Wakolosai 3:14 Pasipo upendo hakuna uhai wala maisha. Maana Mungu ni Pendo. Upendo uliokamili tumepewa na Mungu mwenyewe. “…na tumaini halitahayarishi; kwa maana pendo la Mungu limekwisha kumiminwa katika mioyo yetu na Roho Mtakatifu tuliyepewa” Rumi 5:5 Kwa maneno mengine tunapokuwa na Roho Mtakatifu, upendo wa Mungu huwa katika mioyo yetu. Wapo watu ambao hujionesha kuwa wamejazwa Roho Mtakatifu, ila upendo hawana. Kumbuka suala si kuwa na roho ila ni roho ya namna gani uliyonayo.

Ni vema kuwa muwazi kwa mwenzako, shirikishaneni mambo yenu katika maisha yenu. Inawezekana ni mambo yaliyopita au yaliyopo au yajayo. Wengine huficha na hata kusema uongo juu ya maisha yao ya nyuma kabla ya uhusiano huo, wakidhani ni kujenga uhusiano. Sivyo hata kidogo, kufanya hivyo ni kuubomoa uhusiano wako. Ukifanya hivyo, maana yake ni kwamba humuamini mpenzi wako au hujui maana ya upendo (humpendi). Ni vema kuwa makini hapa, maana ni lazima uwe na ufahamu wa ki-Mungu na ujue ni lipi la kusema kwa kiwango gani na wakati gani, na kwa nani. Uwe na ufahamu wa kuwatambua marafiki kwa aina zao. Maana unaweza kujikuta unaeleza mambo yako muhimu kwa mtu ambaye hana mpango wowote na wewe, na pengine anaweza akakuumiza sana.

Kumbuka upendo haubadilishwi na kitu chochote. Kwa hiyo kama mtu anadai kuwa anakupenda lakini ukimwambia mambo yako yaliyokutokea hapo nyuma naye akaona kuwa ni mabaya na hawezi kuwa na wewe tena, uwe na uhakika alikuwa hakupendi, ila anayapenda mambo yako ya sasa. Na pengine tafsiri yake au uelewa wake juu ya upendo ni finyu. Wahenga walisema, usione vyaelea vimeundwa. Maana yake, kila kitu kina gharama yake, na ukiona kitu kizuri jua ipo gharama iliyosababisha uzuri huo. Hapa sina maana uropoke kila kitu kilichokwishapita, ila ikiwa rafiki yako atakuuliza kitu, sema kweli maana uongo si tu unaharibu uhusiano wenu ila pia ni dhambi, na hii humpa Ibilisi nafasi ya kuwashambulia. Kila neno lina muda wake unaofaa kunenwa. “…neno linenwalo wakati wa kufaa ni jema kama nini!” Mithali 15:23

Wengi hudhani ikiwa uongo waliosema hautajulikana, basi watakuwa salama. Si hivyo hata kidogo. Ubaya wa uongo na athari zake zipo pale pale, haijalishi uongo huo umejulikana au la. Hebu tusome vizuri maandiko; “Shahidi wa uongo hakosi ataadhibiwa; naye asemaye uongo ataangamia” Mithali 19:9 Shahidi wa uongo ataadhibiwa, kwa nini? Ni kwa sababu ameonekana na uongo wake umejulikana, kwa hiyo anaweza kuadhibiwa. Lakini asemaye uongo ataangamia, sio ataangamizwa na tena sio ataadhibiwa. Inawezekana ikawa ngumu kumuadhibu, maana inawezekana uongo wake haukujulikana, kwa hiyo hata kuangamizwa inaweza ikawa ngumu pia. Biblia inasema ataangamia; nini kitamwangamiza? Bila shaka ni uongo aliousema.

Ibilisi ndiye baba wa uongo. Ukisema uongo maana yake unajikabidhisha au unajihalalisha kuwa mtoto wake. Wengi hawajui hili, wanajua tu kwamba uongo ni dhambi, basi. Sawa! Ila tangu leo tambua siri hii itakusaidia sana. Unaposema uongo, hata kama haitajulikana kwamba ulidanganya, utakuwa tayari wewe ni mtoto wa Ibilisi, aliye baba wa uongo. Uongo kamwe hauokoi urafiki au uhusiano wako, bali uongo unaangamiza kila kitu chema.

Masuala yanayohusu mahusiano mliyokuwa nayo kabla ya ninyi kukutana si vema sana kuyazungumza. Maana mara nyingi masuala hayo huendeshwa kwa hisia. Hata hivyo masuala yanayohusu uhusiano uliokuwa nao au aliokuwa nao rafiki yako, huwa hayana msaada sana. Hakuna haja ya kujiongezea taarifa za kuumiza, wakati hazina msaada. Ila kama zinahitajika kwa ajili ya kujenga uhusiano wenu wa sasa mnaweza kuzungumza. Mambo ya mahusiano yaliyopita au yaliyovunjika kabla ya uhusiano wa sasa yatumike na mtu binafsi katika kulinda na kutunza uhusiano alionao sasa, lakini ni vema kuepuka kuyajadili. Jifunze kutokana na makosa yaliyotokea katika urafiki uliopita.

Matatizo au kasoro zenu katika uhusiano wenu wa sasa, msiziache pasipo kuzitatua. Zitatueni haraka na mapema iwezekanavyo, ili kasoro hizo zipone. Na kama zitabaki basi labda yawe makovu, lakini si vidonda. Maana kidonda huuma lakini kovu haliumi. Haijalishi ni muda gani umepita kama kidonda hakijatibiwa na kupona, maumivu yataendelea kuwapo. Na kidonda chaweza kuongezeka, maumivu yakawa makali zaidi, ikawa ngumu hata kutibika. Ni vema ujue kuwa ikiwa kuna mambo hamtayatatua katika uhusiano wenu au ndoa yenu, yanaweza kuwasumbua hapo baadaye hata miaka kumi na mitano (15) ijayo. Uwe makini sana katika kutunza uhusiano au ndoa yako. Si jambo gumu unahitaji ufahamu na uelewa tu. “Yesu akamwambia, Ukiweza! Yote yawezekana kwake aaminiye” Marko 9:23

Katika upendo uwe tayari kuwa na rafiki yako katika maisha yako yote. Upendo si hali ya kujisikia uchungu kwa namna ambayo unaona kana kwamba umeonewa au kufanyiwa isivyostahili. Na kamwe, upendo si kuwa na hasira. Upendo husababisha aina fulani ya furaha ndani ya mtu pale unapomtendea mtu mambo au jambo jema, bila kujali yeye amekufanyia nini au atakufanyia nini hapo baadaye. Ni kweli unaweza ukapata maumivu ya..... Itaendelea 

Na Dk George Adriano
Tanzania



Semina ya Mwl Christopher Mwakasege viwanja vya Jangwani, DSM tar 24 Feb-03 Machi