Uhusiano Wako Hujengwa na Wewe Mwenyewe-2

Ikiwa hukusoma sehemu ya Kwanza ni vema ufanye hivyo, maana sitatoa muhtasari hapa ili na wewe uchukue wajibu wako wa kujifunza...!

Upendo si hali ya kujisikia uchungu kwa namna ambayo unaona kana kwamba umeonewa au kufanyiwa isivyostahili. Na kamwe, upendo si kuwa na hasira. Upendo husababisha aina fulani ya furaha ndani ya mtu pale unapomtendea mtu mambo au jambo jema, bila kujali yeye amekufanyia nini au atakufanyia nini hapo baadaye. Ni kweli unaweza ukapata maumivu ya mwili pale unapokuwa ukitenda mema hayo, lakini maumivu hayo hayasababishi ujisikie uchungu wa hasira wala kufadhaika bali furaha ya ndani. Hata unapotunza nafsi yako huwa unaingia gharama na wakati mwingine huwa unaumia mwili wako.

 “Lakini kama mnavyoshiriki mateso ya Kristo, furahini; ili na katika ufunuo wa utukufu wake mfurahi kwa shangwe. Mkilaumiwa kwa ajili ya jina la Kristo ni heri yenu; kwa kuwa Roho wa utukufu na wa Mungu anawakalia” 1 Petro 4:13-14 Mtume Paulo, anazungumza habari ya sisi kushiriki mateso ya Kristo na kufurahi kwa wakati uo huo.  Si jambo rahisi kuwa na furaha wakati wa mateso, ni mpaka uwe na uelewa wa rohoni utokao kwa Mungu, yaani ufahamu wa ki-Mungu.  Ndiyo maana Mtume Paulo anasema, kwa kuwa Roho wa utukufu na wa Mungu anawakalia. Maana yake ni kwamba linafanyika jambo, linakuumiza mwili au nafsi yako, lakini kwa wakati uo huo unakuwa na furaha ndani yako. Furaha haisababishwi na maumivu unayoyapata bali inatokana na ufahamu au uelewa utokao kwa Mungu, ulio nao ndani yako. Hauangalii mates ohayo bali unaangalia kile chema ulichofanya. Kumbuka upendo haushindwi na kitu chochote.

i.                    Mawasiliano

·         Sikiliza

Mara nyingi urafiki na wakati mwingine hata ndoa huvunjika au kukosa amani na furaha kwa sababu ya mawasiliano mabaya. Wanapendana kabisa tena kwa dhati na kwa moyo wote, lakini mawasiliano, hovyo. Msikilize mwenzako kwa umakini mkubwa, huku ukimtazama. Si unatazama televisheni au unasikiza redio au unasoma kitabu au gazeti halafu unamwambia ‘nakusikiliza endelea’.  Ni vema kusikiliza kwa makini huku ukimtazama mwenzako machoni ikibidi. Hii humpa hamasa anayezungumza, kuendelea kuzungumza, hujisikia kusikilizwa na kuthaminiwa, hasa unapoacha kufanya ulichokuwa ukifanya; ukiacha kusikiliza redio au kutazama luninga, kusoma kitabu au gazeti halafu ukamsikiliza mwenzako ni vema sana, inabariki. Na wakati mwingine kama mpo pamoja epuka kuchezea simu, kuandika ujumbe mfupi wa maneno kwenye simu yako au kupiga na kupokea simu mara kwa mara. Kama umeamua kutoka na rafiki yako basi ikiwezekana zimeni simu zenu. Haileti picha nzuri wakati unaongea na mpenzi wako yeye anapokea simu au anasoma ujumbe wa simu n.k.

Katika kusikiliza kuna namna nyingi za kusikiliza. Kuna mtu anasikiliza ili tu aonekane anasikiliza. Mwingine anasikiliza kwa lengo la kusubiri nafasi yake kujibu au aongee. Wapo wanaosikiliza ili tu umalize kuongea, na pia wengine husikiliza kwa sababu ni wajibu kusikiliza. Lakini unapaswa kusikiliza kwa lengo la kuelewa uhalisi wa unachoelezwa kama vile yule anayekueleza anavyoelewa. Yaani unajitahidi uelewe kama yeye. Maana ukielewa tofauti na anachomaanisha inakuwa haina maana sana. Kuelezwa na kusikiliza kwako vyote ni kazi bure. Maana hata utakavyojibu haitakuwa sawa sana maana hukuelwa kama alivyokusudia, rafiki yako. 

·         Subiri

Vilevile ni vema usubiri mwenzako amalize kuzungumza. Si unamkatisha kuzungumza ukidhani kuwa umekwishamuelewa, si tabia njema. Kutomkatisha mtu anapozungumza, si tu humfanya mwenzako kujisikia kuthaminiwa, lakini pia kuna faida kubwa kumsikiliza mtu mpaka anapomaliza kuzungumza. Hii hukusaidia wewe kutambua kwa usahihi fikira, mawazo au mtazamo wa mwenzako juu ya jambo analozungumzia. Hivyo kukupa wewe nafasi nzuri ya kuzungumza au kujibu kwa usahihi zaidi. Maana kuna watu wengine hupenda kudakia wakati mwenzake akizungumza. Huko ni kukosa utashi wa mawasiliano, lakini pia ni dalili ya ubinafsi na dharau japo si lazima iwe hivyo. Maana yake ni kwamba unadhani wewe ndiyo upo sahihi kuliko mwenzako, au huthamini anachokisema, unakidharau au unamdharau yeye mwenyewe. Tabia hiyo inaweza kabisa kuharibu urafiki wako. Kumkatisha mwenzako kuzungumza kufanyike pale tu inapodi, na hasa ikilenga ama kuepusha au kutatua tatizo fulani.

·         Elewa

Pamoja na kusikiliza hakikisha umeelewa. Unapomsikiliza mwenzako, jaribu kuomba ufafanuzi pale ambapo hujaelewa ukionesha hisia za kuguswa, au msisimko wa kile anachokieleza.  Usisikilize tu ili kutimiza wajibu. Ili kuonesha kuwa upo makini ukimsikiliza. Jaribu kutumia maneno yanayoonesha kuwa upo makini; maneno kama vile, ‘unamaanisha nini hasa unaposema….’ au  ‘ehe halafu ikawaje…?’ au ‘kwa hiyo na yeye aka…’ au ‘mmh, jamani, sasa ulifanyaje?’ au ‘hebu nieleweshe, kwa nini umeamua hivyo?’ n.k Hii inategemea na aina ya mazungumzo na kinachozungumzwa. Wakati mwingine si vema sana kujibu swali kwa kutumia swali. Swali lijibu swali inapobidi tu hasa katika kufafanua au kufanya kitu au jambo lieleweke zaidi.

·         Eleweka

Unapoeleza kitu au jambo jaribu, kufupisha lakini pasipo kupoteza maana ya ulichotaka kusema au kueleza. Usizungumze hadithi ndefu kupita kiasi, hasa kama wewe si mtaalamu mzuri wa kuhadithia katika mtiririko unaoeleweka. Hii inategemea na namna rafiki yako alivyo au anavyopendelea. Maana unaweza kudhani kuwa unahadithia vizuri, kumbe kila unavyozidi kuongea ndivyo unavyozidi kumchanganya mwenzako na wakati mwingine kujichanganya hata wewe mwenyewe. Hii inaweza kuleta hisia kuwa unachosema ni uongo au kuna jambo unaficha, ndiyo maana unazunguka zunguka badala ya kueleza moja kwa moja. Eleza kwa ufupi, tena vitu muhimu vyenye kujenga au vyenye mafunzo au changamoto ndani yake. Ili pamoja na kufurahi na rafiki yako, lakini pia mjifunze mambo ya msingi ya kuboresha uhusiano wenu.

Ni vema utambue kuwa katika uhusiano hasa kwa kipindi cha mwanzo hata jambo dogo lina maana kubwa katika uhusiano. Kusita kueleza kitu, labda kwa sababu...... Itaendelea sehemu ya 3

Nitafurahi kupata maoni, ushuhuda, maswali au ukinishirikisha jambo lolote. Hakuna gharama yoyote.
Na Dk George Adriano
Simu Na. +255 715 182 106
Nipo Dodoma kwa sasa.