Tanzania na Viongozi Wetu

Hili ni Jina tarajiwa la Kitabu Kitarajiwa

..........Kiongozi anayeona mbele na asiamini anachokiona na asipokuwa na nia ya kutaka kufikia yale mazuri ayaonayo mbele yake, hafai kuwa kiongozi. Haina maana kuwa na maono pasipo msukumo wa kuyafikia maono hayo. Wapo viongozi wa aina mbalimbali kwa namna walivyo.

1.      Viongozi Wanaotumia Madaraka Kufanikisha Mambo Yao

Wapo viongozi wenye ushawishi mkubwa hasa wa kisiasa na wanaonekana kuwa na maono. Wapo viongozi si tu wanaonekana kuwa na maono lakini pia wanaonekana kuwa na uwezo wa kuwafikisha wenzake kule anapopaona. Mara nyingi hufanya mambo makubwa na wakati mwingine kwa ujasiri sana lakini ndani yao hawaoni maisha ya wengine bali maisha yao pekee. Viongozi wa aina hii hawatambuliki mwanzoni ila baada ya muda hutambulika tu kuwa msukumo ulio ndani yao si kutetea wanyonge ila ni kwa ajili ya matumbo yao.

Hupenda sifa na kuonekana na watu. Mara nyingi hawapotezi nafasi ya kujionesha kwa wananchi au jamii yake hata kwa mambo madogo. Hupenda kuonekana kuwa wanapenda watu na hujichanganya na watu ili waonekane wazuri sana.

Si ajabu ukimkuta akimpa fedha ombaomba barabarani au akimpa fedha mtoto wa mtaani anayeombaomba barabarani pasipo hata kujua kama kweli ni yatima au la! Kwa watu makini wanaoelewa nini maana ya uongozi, kwamba ni kuwa na uwezo wa kuona mbele zaidi ya wengine na kuwa na uwezo wa kuwashawishi kufikia huko mbele, watakubaliana na mimi kuwa kiongozi yeyote anayefanya hayo hana tofauti na raia wake. Maana raia wa kawaida vilevile huwapa fedha ombaomba hao wanaoketi kandokando mwa barabara. Sasa tofauti yake na wananchi wake ni ipi? Tofauti inawezakuwa ni lengo la kufanya hivyo. Wakati kwa kaisi kikubwa mwananchi anaweza kumpa fedha kidogo ombaomba kwa lengo la kumsaidia lakini kwa kiongozi huyu yeye atataka pia aonekane mwema, ndiyo maana hutaka kupigwa picha na kutangazwa. Kwa maneno mengine anasisitiza watu waendelee kuombaomba au anakubaliana na watoto wanaozurura mitaani kuendelea kuombomba pasipo kutafuta suluhu ya kudumu.

Na mara nyingi anapotoa fedha, lengo lake si kutatua tatizo au kumsaidia yule anayeomba ila lengo lake ni kujionesha kuwa mwema. Kujionesha kuwa yeye ni mtu wa watu ili aendelee kujinufaisha yeye na familia yake. Kuwa mtu wa watu katika kuwasaidia kwa dhati katika njia stahili ukiongozwa na dhamira ya kweli na iliyo thabiti ni sawa lakini si katika unafiki ili utimize tamaa yako binafsi. Nikuhakikishie hivi, kiongozi yeyote au mtu yeyote anayependa kuonekana mwema machoni pa watu hafai kuwa kiongozi hata kwa kikundi kidogo cha watu wachache.  Hutafuta kuonekana wazuri ili wapate sifa na nafasi ya kunyonya wengine.

Ninazungumza niliyoyaona mwenyewe, si ya kuambiwa wala kuhadithiwa. Nimekuwa nikifuatilia hili kwa miaka nane sasa. Mtu yeyote anayefanya mambo mazuri kwa lengo la kujionesha kwa watu kuwa mwema mara nyingi huwa si wema. Mara nyingi huwa na ajenda yao wanayoijua wao. Na hata kama hawana ajenda yoyote nyuma ya hayo wanayoyafanya lakini matokeo ya nilivyofuatilia yanaonesha kuwa bado huwa si watu imara, si watu thabiti na makini kuwa viongozi.

Viongozi katika kundi hili mara nyingi huwa ni wezi. Mara nyingi utasikia wameficha fedha nje ya nchi au wameweka fedha nyingi katika mabenki ya nje ya nchi zao. Nikuhakikishie pasi na shaka kuwa kiongozi yeyote mahala popote duniani anayeweka fedha nje ya nchi yake hata kama ni fedha zake halali kabisa, bado hafai kuwa kiongozi. Huyo hana uchungu na Taifa lake, hana uchungu na watu wake, hana uchungu na watu wa nchi yake na kwa hakika si mzalendo hata kidogo. Baba anayejali familia yake hawezi kufanya mambo yanayonufaisha jirani huku wanawe wakihangaika kwa njaa. Kiongozi mwenye uzalendo na nchi yake hawezi kujenga hoteli za kifahari nje ya nchi na asijenge katika nchi yake mwenyewe.

Viongozi au watawala wa aina hii, huwa na maisha ya kifahari wao na ndugu zao. Ama mkewe, au wanawe na hata mashemeji wanaweza kuwa matajiri wa kupingukia na mara nyingi hupata fedha zao kiujanjaujanja tu; huwezi kueleza au kuonesha wazi miradi au biashara wanazofanya. Na kama wanafanya biashara, basi utashangaa maana biashara zao mara nyingi huwa haziendani na utajiri walio nao. Na hata katika biashara hufanya kwa mbinu mbalimbali wakikiuka taratibu au sheria za nchi kwa mufaa yao. Unakuta mtoto wa rais mathalani, ana biashara za kawaida tu ambazo hata watu wengine wanazo lakini yeye ni milionea.

Na kama utaweza kuchunguza walivyopata madaraka ni mara chache utakuta wamechaguliwa kihalali. Mara nyingi hutumia mbinu mbalimbali wanazozijua wao ili kupata madaraka. Si vibaya nikizungumzia mbinu chache ambazo zinaweza kutumika kupata madaraka ili watekeleze ajenda zao. Sasa si lazima mbinu au njia zote nitakazoeleza hapa zitumike lakini nataka ujue na uwe makini na mambo yanaweza kuangamiza Taifa lolote lile duniani, lakini hasa katika nchi za Afrika.

Hutumia Propaganda

Propaganda hutumiwa sana hata katika mataifa makubwa duniani. Propaganda za kitoto na hata za kijinga hutumika sana katika nchi zinazoendelea kama Tanzania. Propaganda hizi huwa haziwezi kufanya kazi katika mataifa yaliyoendelea. Hizi hufaa kwa wananchi wajinga. Nchi zinazoendelea na zenye watu werevu wa kutosha huhitaji utaalamu na umakini mkubwa katika kuhakikisha propaganda inafanya kazi iliyokusudiwa.

Viongozi wa aina hii hupenda kuonekana wazuri kwa kutumia gharama za wengine. Hutumia gharama za wengine kwa maana ya kuwafanya wengine waonekane wabaya ila yeye aonekane mzuri na anafaa. Na mara nyingi hiyo huwa propaganda tu.

Hutumia njia mbalimbali kufikia katika adhma yake ya kutukuzwa. Pamoja na njia nyingine lakini hutumia propaganda kuwachafua wengine au kuwasema kuwa ni dhaifu. Kiongozi wa aina hii huwa....


Nitaendelea nikipata maoni ya waasomaji.... maana kuna vitu sensitive ....


Dk. George